مصر… من تحت الزيزفونة

هو ليه بيسمو القاهرة ، مصر ؟؟

يعني ليه في الأرياف يقولون إن فلان ده “نازل مصر” أو “جي من مصر ” (وفي هذه الحالة تكون حصلت لهم البركة بمعرفته و لازم يعملوا معه الواجب علشان غريب ) ..

هو طبعاً مفيش شك إن قاهرة المعز مدينة ،عاصمة، واسعة كبيرة ، لها تاريخ عريق، وماضي سحيق، يقطن بها أكثر من 13 مليون ويصل تعدادها صباحاً في وسط الاسبوع إلى أكثر من 17 مليون (معلومات غير مؤكدة ..بس بسمع كدة ..وصراحةً في بعض الأحيان أشعر إن العدد في الليمون .. ) ، بس هذا لا يجعل من مصر تنحصر في “القاهرة” ..ولا إيه ؟

هو الموضوع مش فلسفي يعني .. كل ما في الأمر اني اكتشفت إن مصر التي أعرفها واقرأ كتب ساخرة عنها وأخبار تشل وترفع الضغط و أشاهد صورها في التليفزيون وأشاهد وزراؤها يفتتحون الكباري ويغلقون الطرق، وأشاهد متشات الأهلي والزمالك فيها، و أتابع منى الشاذلي ومحمود سعد يتحدثون عنها ، ما هي إلا مصر – القاهرة ..

أما مصر – ال-27 محافظة ، فأنا يدوب أعرف/زرت  منهم كام محافظة ( جنوب سيناء ، حلوان -بحكم الجامعة يعني ، الاسكندرية ، الوادي الجديد بحكم ذهابي إلى الواحات ، قنا-الأقصر يعني ، وأسوان ..و .. الدقهلية) ومع ذلك لازلت أتكلم وأسخر وأتابع وأشاهد واستنكر ما يحدث في مصر -القاهرة ..

هو الناس التانية دي عايشة ازاي وعاملة إيه ؟؟ وليه محدش بيعبرهم إلا قليلاً قليلاً ؟

كلما اذهب إلى “كفر الروك ”  (سيبك من الاسم دلوقتي .. دة عاوز له بوست لوحده ) ، محافظة الدقهلية، مسقط رأس جدي ، أفكر في هذا الأمر.. وثاني أيام عيد الفطر تكررت هذه الرحلة التي طالما .. كرهتها.. مع الأسف..

لا استطيع تحديد سبب عدم حبي لهذا المكان مع إنه “الريف المصري” الذي قد يعتقد الكثيرين إنه صورة طبق الأصل من الريف الذي يجري ويلعب فيه الأطفال في إعلان “وقفة مصرية” (إذا لم تكن متابع لتلك الحملة الاعلانية ..البناءة .. فأرجوك تابعها.. فايتك كتير ) والتي يظهر فيها المزارع دائماً شخص أبله لسبب أجهله .. فعلاً مش فاهمه يعني إعلان زي دة هشوفه أنا وهغير من منطق تفكيري وسيؤثر فيا وفي عاداتي وتقاليدي يعني بتلك الطريقة الطفولية العبيطة و بشوية شربات اقسمهم على 6 أكواب بدلاً من إثنين ؟؟ هموت و اعرف إيه المغزى من هذه الاعلانات ؟ ولا هي حملات إعلانية والسلام ؟

المهم .. ذهبنا الكفر الروك التي تبعد عن منزلنا بالقاهرة بالظبط 100 كيلو … طبعاً المفروض إن ال-100  كيلو دول لا يأخذوا أكثر من ساعة .. و لكن هيهات هيهات .. لا نأخذهم في أقل من ساعتين كل مرة . من بعد طريق بلبيس (عارف فين مدرسة البي بي سي ؟ أهه من هناك كدة ..) والدنيا بتبقى لعبة في الملاهي . الطريق معظمه غير ممهد ، أو يمكن كان ممهد وجار عليه الزمن وأعمال الحفر ، دة غير إن الطريق مزدوج في كثير من الأحيان ، يمينك ترعة أو مصرف ، وشمالك مزارع. الطريق عرضه لا يزيد عن 4 متر ، يستحوذ التوك توك منهم على 2 كدة🙂 ..

التوك توك .. لابد أن يكون له وقفة (مصرية.. أو صينية) لوحده . استطيع أن أقول أن التوك توك هو وسيلة المواصلات الأولى والأهم في وجه بحري اليوم . إستطاع أن يمتلك قلوب وعقول الجميع . الكل يركبه والكل يقوده . الطفل، الشاب، العجوز.  التوك توك ، هو الخل الوفي . التوك توك ، هو حلك الأمثل للحياه في محافظات بحري ، ومش بعيد يصبح من متطلبات الزواج مثل النيش والدش والوصلة (أحد أهم اختراعات المصريين طبعاً ) قريباً .

el 7elwa kaydahom😉

على ضفاف الترعة تجد التوك توك مصطف على رجل واحدة ، في منظر حضاري بألوانه الزاهية تسر الناظرين ، وأصحابه تحت في الترعة يحضرون الماء والصابون لتصبينه وتلميعه كالملك .. سبحان الله غالباً التوك توك يهتم به وبنظافته أكثر من أبناء وشوارع تلك المدن . وفي العيد تجد التوك توك مزين ومتريش على الاخر، تنبعث منه أصوات مغنيين لم أسمع بهم في حياتي ويغني من فيه ويصفقون .. فالعيد فرحة ..

أنا لا اعترض على وجود التوك توك على فكرة ، مع إن طيش ساقيه كان هيوادينا في خبر كان .. زي ما قلت، الطريق مزدوج ، وفي بعض الأحيان يجب أن تختار إما التوك توك أو البقرة أو حياتك .. و بعدين هو البتاع دة مش بيترخص ؟ مفيش سن قانوني للقيادة حتى ؟ أنا لا اعترض عليه لأنه ملائم تماماً لطبيعة شوارع مدن بحري .. ولكن للشوارع فقرة أخرى ..

الشوارع .. من أكبرها إلى أصغرها شارع أو حارة مفيش أي علامات أو إشارات أو تمهيد أو خطوط أو أي حاجة في أي حتة .. البقاء للاقوى ( سيارات النقل ) أو الأسرع (المكروباز ) أو الأذكى (التوك توك ) .. ولا عزاء للملاكي .. المطبات جزء أساسي من تضاريس أي شارع ، والزبالة والتراب تجعلك لا تفهم هو فين أصلاً الشارع .. على فكرة أنا لا أعمم .. فأكيد في مناطق كويسة، لكن دة الطريق الذي أسلكه كل مرة ، من الزقازيق إلى “ديرب نجم ” (سيباك برضه من الإسم ) حتى مدخل الدقهلية ثم كفر الروك ..

العمارات والمنازل .. لأ سيبك إنت .. تشعر إن القبح وعدم تناسق الألوان سمة في دماء المصريين .. طب مش برضه الناس دي بتشوف الاخضر وتتمتع بالطبيعة الخلابة في مزارعهم وارضهم ؟ مفيش إنعكاس على الذوق ليه ؟ وبعدين الفقر ليس سبباً في إنتشار القبح .. مش ممكن يعني البلكونة قيشاني موف أو أخضر فاقع وباقي العمارة أحمر ! طب حتى الطوب الأحمر كان أفضل .. إيه دة ! ليه كدة ؟ طب دة حتى العين تتعب ! طبعاً لا يخلو منزل من كمية من أطباق الدش .. فكما قلنا، الدش من مقومات الزواج .. أصلاً كان وصلة الإيه ار تي وشبكات الأوربت واصلة عندنا البلد قبل القاهرة بشهور عديدة ..

مداخل المدن .. ديه بقى قصة مختلفة تماماً في إنحدار الذوق و-“العك” ..تماثيل غريبة، بورتريهات وهمية، زلعة مثل تلك التي يختبيء فيها علي بابا ويافطة رائعة مكتوب عليها مرحباً بك في مدينة كذا وحولها حوالي 123787438579347897345 من إعلانات تأييد وترشيح أبناء البلد في إنتخابات مجلس الشعب القادمة .. هو ليه أعضاء المجلس الموقر لتلك الدوائر لا ينظرون بعين الرحمة والشفقة حتى لمدخل مدنهم .. مش بقول كل البيوت والعمارات .. المدخل بس حتى ؟ ستقول لي إن في حاجات أهم مثل بناء المستشفيات والمدارس لتعليم هذا الشعب .. إذاً دعني أحدثك عن تعليم ..أو جهل هذا الشعب ..

هو فين التعليم دة إذا كان الأطفال يتخرجون من المدارس لا يعرفون الكتابة ؟ و إذا كان أكثر ما ينفقون فيه هو البلاي ستشن والانترنت كافيه (آه والله في كفر الروك ) ويحضرون الدي جي إلى الفرح ولكن لا يؤمنون أن الاستحمام في الترعة هيجيب أجلهم مع كل الحملات الاعلانية عن البلهارسيا من عام 1980 ! و هو فين التعليم إذا كانت الأرض تبور والمخ يبور معها وأكبر هم الشاب إنه “ينزل مصر” وأكبر هم البنت انها تشوف مهند أو معرفش مين هينيل إيه ..

المهم..وصلنا إلى كفر الروك وإلى منزل جدي (وهو منزل قديم مكون من دورين في مزرعة/أرض كانت زمان كبيرة واسعة ولكن جار عليها الزمن هي كمان ) وجلسنا تحت الزيزفونة في الرطوبة مع بعض من الفراخ الرومي التي تتجول في المكان وسرحت أنا في تفكيري في مصر إلي عاوزة أرجع لها .. أقصد القاهرة ..

وللحديث عن مصر الكبرى بقية ..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s